ஒவ்வொரு ஆண்டும் தமிழக அரசு சார்பில் சிறந்த நடிகர் நடிகை தொழில்நுட்ப கலைஞர்களுக்கு விருதுகள் வழங்கப்பட்டு வருகிறது. கடந்த சில வருடங்களாக இந்த விருதுகள் இரண்டு வருடங்களுக்கு ஒரு முறை அல்லது மூன்று வருடங்களுக்கு ஒரு முறையாக தொகுத்து வழங்கப்பட்டு வருகிறது. இந்நிலையில்
கடந்த 2016ம் ஆண்டு முதல் 2022 ம் ஆண்டு வரையிலான 6 ஆண்டுகளுக்கான திரைப்பட விருதுகளை தமிழக அரசு அறிவித்துள்ளது.
திரைப்பட விருதுகள் வழங்கும் விழா பிப்ரவரி 13-ம் தேதி மாலை 4.30 மணிக்கு சென்னை கலைவாணர் அரங்கில் நடைபெறுகிறது. விருதுகளை துணை முதல்வர் உதயநிதி ஸ்டாலின் வழங்குகிறார்.
விருது பெறும் நடிகர், நடிகைகள், தொழில்நுட்ப கலைஞர்கள், திரைப்படங்கள் மற்றும் சின்னத்திரை நடிகர்கள் விவரங்கள் வருமாறு:
சூர்யா, கார்த்தி, தனுஷ் , பார்த்திபன், விஜய்சேதுபதி, ஆர்யா, விக்ரம் பிரபு ஆகியோர் சிறந்த நடிகராகவும், கீர்த்தி சுரேஷ், நயன்தாரா, ஜோதிகா, மஞ்சுவாரியர், அபர்ணாபாலமுரளி, லிஜோமோல்ஜோஸ், சாய்பல்லவி ஆகியோர் சிறந்த நடிகைகளாகவும் தேர்வு செய்யப்பட்டுள்ளனர்.
அதேபோல், 2014ம் ஆண்டு முதல் 2022-ம் ஆண்டு வரையான சிறந்த டிவி நெடுந்தொடர்கள், கதாநாயகன், கதாநாயகி, வாழ்நாள் சாதனையாளர், தொழில்நுட்பக் கலைஞர்களுக்கு சின்னத்திரை விருதுகளும், 2015 -16 கல்வியாண்டு முதல் 2021 – 22 கல்வியாண்டு வரை தமிழ்நாடு அரசு எம்ஜிஆர் திரைப்படம் மற்றும் தொலைக்காட்சி பயிற்சி நிறுவன மாணவர் விருதுகளும் தேர்வு செய்யப்பட்டு அரசாணை வெளியிடப்பட்டுள்ளது.
மாநகரம், அறம், பரியேறும் பெருமாள், அசுரன், கூழாங்கல், ஜெய்பீம், கார்கி ஆகியவை சிறந்த திரைப்படங்களாக தேர்வு செய்யப்பட்டுள்ளன.
சின்னத்திரை விருதுகளுக்காக நடிகர்கள் ஆர்.பாண்டியராஜன், கவுசிக், கிருஷ்ணா, தலைவாசல் விஜய், வ.சஞ்சீவ், ஜெய்ஆகாஷ், கார்த்திக்ராஜ் ஆகியோர் சிறந்த கதாநாயகர்களாகவும், நடிகைகள் ராதிகா சரத்குமார், வாணிபோஜன், நீலிமாராணி, சங்கவி, ரேவதி, ரேஷ்மா, சபானா ஷாஜகான், கெபரல்லா செல்லஸ், சைத்ரா ஆகியோர் சிறந்த கதாநாயகிகளாகவும் தேர்வு செய்யப்பட்டுள்ளனர்.
அழகி, ரோமாபுரி பாண்டியன், இராமனுஜர், நந்தினி, பூவே பூச்சூடவா, செம்பருத்தி, இராசாத்தி, சுந்தரி, எதிர்நீச்சல் ஆகிய தொடர்கள் சிறந்த நெடுந்தொடர்களாக தேர்வு செய்யப்பட்டுள்ளன.
தமிழக அரசால் தேர்ந்தெடுக்கப்பட்டுள்ள சிறந்த திரைப்படங்களுக்கு முதல் பரிசாக ரூ.2 லட்சமும், 2-ம் பரிசாக ரூ.1 லட்சமும், 3-ம் பரிசாக ரூ.75 ஆயிரமும், சிறப்புப் பரிசாக ரூ.75 ஆயிரமும், பெண்களைப் பற்றி உயர்வாக சித்தரிக்கும் படத்துக்கு சிறப்புப் பரிசு ரூ.1.25 லட்சமும் வழங்கப்படுவதுடன், சிறந்த நடிகர், நடிகையர் சிறந்த தொழில்நுட்பக் கலைஞர்களுக்கு தலா 1 பவுன் தங்கப்பதக்கம், நினைவுப் பரிசு மற்றும் சான்றிதழும் வழங்கப்படுகின்றன.
சின்னத்திரை சிறந்த நெடுந்தொடர்களுக்கு முதல் பரிசாக ரூ.2 லட்சமும், 2-ம் பரிசாக ரூ.1 லட்சமும், ஆண்டின் சிறந்த சாதனையாளர் பரிசாக ரூ.1 லட்சமும், ஆண்டின் வாழ்நாள் சாதனையாளர் பரிசாக ரூ.1 லட்சமும் வழங்கப்படுவதுடன், சிறந்த கதாநாயகன், கதாநாயகி, சிறந்த தொழில்நுட்பக் கலைஞர்களுக்கு தலா 1 பவுன் தங்கப்பதக்கம், நினைவுப்பரிசு மற்றும் சான்றிதழும் வழங்கப்படுகின்றன.
தமிழ்நாடு அரசு எம்.ஜி.ஆர். திரைப்படம் மற்றும் தொலைக்காட்சிப் பயிற்சி நிறுவன மாணவர் விருதுக்கு தேர்வு செய்யப்பட்ட மாணவர்களுக்கு தலா ரூ.25 ஆயிரம் ரொக்கம், நினைவுப்பரிசு மற்றும் சான்றிதழும் வழங்கப்படுகிறது.
